He mea waihanga i Aotearoa - Te Tiriti o Waitangi.
|

Kei tĒnei wĀhanga

He aha tēnei mea, te Tiriti o Waitangi?

He aha te Whakaputanga o te Rangatiratanga o Nu Tīreni?

Nā wai i haina te Tiriti, nōnahea i hainatia ai, i hea?

He aha i whakatūria ai te Tiriti o Waitangi?

Ka pēhea i muri mai i te hainatanga o te Tiriti?

He hanga whai take tonu te Tiriti i ēnei rā?

I hea kē te Tiriti e huna ana taka mai ki nāianei?

English version of this page

NGĀ FAQ

Te Tiriti

E hoki ki muri

He aha tēnei mea, te Tiriti o Waitangi?

Ko te Tiriti o Waitangi te tuhinga taketake o Aotearoa. He kirimana te Tiriti i whakaaetia e ngā māngai o te Karauna me ērā o ngā iwi me ngā hapū Māori. I tapaina ki te ingoa o te wāhi i Pēwhairangi i hainahia tuatahitia ai te Tiriti, i te 6 Pēpuere 1840. Heoi anō, he mea haina i ngā tōpito maha o te motu i muri mai. Pērā anō i ngā tiriti katoa, he whakawhitinga kī taurangi te Tiriti i waenga i ngā tāngata whai pānga mai. He mea tuhi te Tiriti ki ngā reo e rua, arā, ki te reo Māori me te reo Pākehā. Ehara tēnei i te hanga ahurei. Ko te nuinga hoki o ngā tiriti i waenga i ngā iwi motuhake, ka tuhia ki ngā reo e rua, e toru, neke atu. Engari kua noho ngā mea i āta whakawhitihia i raro i te Tiriti o Waitangi hei taukumekumenga nā te ngutu, i te mea he rerekē te tikanga o ngā kupu i te tauira reo Māori me te tauira reo Pākehā. (Kei te wāhanga "Pānuitia te Tiriti" te roanga atu o ngā whakamārama.) Ko te hiahia o Ingarangi Nui Tonu, kia riro i a rātou te mana whenua tūturu, otirā, kia mau tonu ki ngā rangatira tō rātou ake mana, kia tiakina anō hoki ō rātou whenua me ā rātou taonga. I tukua anō hoki ki a rātou ngā whāinga tika katoa i uhia ki runga i ngā tāngata tūturu o Ingarangi.

Ahakoa kua āhua taretare i roto i ngā tau, kei te toitū tonu te tānga ake o te Tiriti i hainatia i Waitangi i te 6 Pēpuere 1840. Arā kei Te Whare Tohu Tuhituhinga o Aotearoa, i Te Whanga-nui-a-Tara, e whakaaturia ana, me ētahi atu tāruatanga e waru e toitū tonu ana.


He aha te Whakaputanga o te Rangatiratanga o Nu Tīreni?

He mea haina te Whakaputanga o te Rangatiratanga o Nu Tïreni i te tau 1835 e ōna anō rangatira Māori i karangahia ko te Whakaminenga o ngā Hapū, me te Rēreneti o Ingarangi, a James Busby (Te Pūhipi). Taka mai ki te tau 1839, e 52 ngā rangatira kua tāia ō rātou ingoa ki te tuhinga nei.

Ko te whakahau a te Whakaputanga, “ko te Kīngitanga, ko te mana i te w[h]enua ... kei ngā tino rangatira”. Ka tonoa te Kīngi o Ingarangi, ... “nō te mea ka ataw[h]ai mātou [ngā rangatira], ka tiaki i ngā Pākehā ... koia ka mea ai mātou ki te Kïngi kia waiho hei matua ki a mātou i tō mātou tamarikitanga, kei whakakāhoretia tō mātou rangatiratanga”.

Arā ētahi taunakitanga e tohu ana he mea tuhi te Whakaputanga e Te Pūhipi ahakoa kāore i whakamanaia e ōna rangatira Pākehā i Ingarangi, ā, ka akiaki hoki ia i ngā rangatira Māori kia haina, i runga i te kī atu tērā tonu ka tau mai ngā Wīwī ki te kapo i te mana whenua ki te kore e whakatūturutia ki a rātou te mana whenua nei. Ki tā ētahi karu hītori, kāore pea te Tari o ngā Koroni i Ingarangi i whakapono he mana tōrangapū tō Aotearoa hei hoa whiri aka haumi mō Ingarangi. Engari ki ētahi karu hītori anō, ahakoa he aha te take i hangaia ai, ka noho ko te Whakaputanga o te Rangatiratanga te kikiri o te mana Māori motuhake. Waihoki, ahakoa he punua pea nā Te Pūhipi, ka whakamanatia te Whakaputanga e te Kāwanatanga o Ingarangi i te tau 1836, ā, ko tētahi whāinga mātāmua o te Tiriti o Waitangi, kia mukua atu te awe o te Whakaputanga, kia taea ai te mana whenua te whakawhiti atu ki a Kuini Wikitōria.


Nā wai i haina te Tiriti, nōnahea i hainatia ai, i hea?

I tāpaea tuatahitia te Tiriti ki te aroaro o tētahi whakarauikatanga e 500 pea ngā Māori i reira, i Waitangi, i te 5 Pēpuere 1840. Nō te 6 Pēpuere i hainatia ai e ētahi rangatira Māori e 40 neke atu. Kātahi ka kawea ki te raki o Waimate, atu i reira ki tētahi hui nui i te Hokianga, ā, ka tāpiria ngā ingoa me ngā waitohu o ētahi atu. Nō te 17 Pēpuere ka tāia ētahi tāruatanga e 200 o te Tiriti. He hui anō ka tū i ngā parenga o Waitematā, he ingoa, he waitohu anō ka tāpiria i reira. Ka āta tāruatia ā-ringa anō hoki ētahi tauira o te Tiriti ake, ā, ka kawea ēnei ki te motu whānui. Mai i te Pēpuere ki te Mahuru o te tau 1840, ka tū ētahi hui āhua 50 nei ki ngā tōpito o te motu, he kohikohi ingoa te kaupapa.

He nui ake i te 500 ngā rangatira i waitohu i tō rātou whakaaetanga ki tētahi o ngā tāruatanga e iwa o te Tiriti e toitū tonu ana. Ko te nuinga, i haina i te tauira reo Māori o te Tiriti, e 39 kau i haina i te tauira reo Pākehā.


He aha i whakatūria ai te Tiriti o Waitangi?

I te whakatūnga o Te Pūhipi hei Rēreneti o Ingarangi, i mōhio tonu te Kāwanatanga o Ingarangi e kore e taea e tōna kotahi te whakatika i ngā mea ture kore o Ingarangi e noho ana ki Aotearoa, te here i ngā kawe riri a te iwi Māori, te āta whakahaere rānei i te taetaenga mai a tauiwi ki Aotearoa, noho ai. E āwangawanga ana hoki te Kāwanatanga i te hokonga o ngā whenua Māori e ngā tāngata o Ingarangi me ētahi atu Pākehā. Me tana māharahara anō pea ki ētahi atu whenua nui o te ao tērā e mea ana ki te kapo i te mana whenua o Aotearoa mō rātou ake. Nā konei i whakatūria ai ko William Hobson (Te Hopihona) hei Māngai, me te tohutohu i a ia kia whiriwhiri i tētahi huarahi e riro ai i a Ingarangi te mana whenua o Aotearoa, e whakatūria anō ai a Aotearoa hei koroni o Ingarangi.

Ka tuhia e Hopihona ētahi kōrero mō roto i te Tiriti, me te āwhina mai a tana hēkeretari. Ka whakapaipaihia ēnei e Te Pūhipi, me tana tāpiri anō i ētahi atu whakaaro. Kātahi ka hoatu mā te mihingare, mā Henry Williams (Te Karuwhā) rāua ko tana tama, a Edward, e whakamāori. Ka whakahokia te Tiriti ki a Te Hopihona i te 5 Pēpuere 1840, hei hora māna ki te aroaro o ngā rangatira i whakarauika mai ki Waitangi i taua rā. Ka noho ko te Tiriti nei te kaupapa o ngā whakawhitinga kōrero i waenga i ngā māngai Pākehā me ngā rangatira, i waenga anō i ngā rangatira, i taua pō. Kāore te Tiriti i tuhia hei kaupapa taketake, hei ture rānei. Engari ia, he whakaputanga mātāpono whānui i noho hei tūāpapa mō tētahi kawenata tōrangapū i waenga i ngā āpiha o Ingarangi me ngā rangatira Māori e noho mai ai he kāwanatanga toipoto ki Aotearoa hei whakataki, hei whakatatū i ngā tini āhuatanga o te wā.


Ka pēhea i muri mai i te hainatanga o te Tiriti?

I muri tata mai i te hainatanga o te Tiriti, ka puta te kupu a Rūtene-Kāwana Hopihona e mea ana kua riro i a Ingarangi te mana whenua o ngā tōpito katoa o Aotearoa. Whakamanatia ana āna whakahau e te Kāwanatanga i Ingarangi i te Oketopa o te tau 1840. I runga i ngā ture o Ingarangi, ka noho a Aotearoa hei wāhanga o te Koroni o New South Wales. I te mutunga o te tau 1840 me te tīmatanga o te tau 1841, ka hurihia tēnei āhua kia noho ai a Aotearoa hei koroni motuhake o Ingarangi. I te tau 1852, ka whakamanatia te Ture Kaupapa Taketake o Aotearoa, i uhia ai ki runga i Aotearoa tōna ake mana kāwanatanga noho haepapa. I raro i tēnei Ture, ka whakatūria he kāwanatanga matua ki Tāmaki-makau-rau (i muri ka nekehia ki Te Whanga-nui-a-Tara), me ōna anō kāwanatanga ā-rohe ki ngā porowini. Heoi, i te tau 1875 ka whakamanahia e te whare pāremata o Aotearoa he ture hei whakakore i ngā kāwanatanga porowini. Kāore noa i tino nui ngā whakarerekētanga i te kaupapa taketake me te pūnaha kāwanatanga o Aotearoa mai i tērā wā. Ko ētahi me kōrero, ko te whakakorenga o te mana o te Kāwanatanga o Ingarangi ki te hanga i ngā ture o Aotearoa, me te whakakorehanga o te Kaunihera Hanga Ture (te whare o runga o te whare pāremata o Aotearoa). Kei te Ture Kaupapa Taketake 1896 e rārangi mai ana ngā āhuatanga kaupapa taketake whai tikanga.

Kāore anō i āta whakaurua te Tiriti o Waitangi ki roto i te pūnaha kaupapa taketake o Aotearoa. Engari he maha ngā ture e whakahua ana i te Tiriti, ā, i te tau 1975 ka whakatūria e te whare pāremata te Ture mō te Tiriti o Waitangi 1975. Nā taua Ture i whakatūria ai te Rōpū Whakamana i te Tiriti o Waitangi, hei huarahi e tirohia ai ngā take a te iwi Māori mō ngā takahanga o te Tiriti.


He hanga whai take tonu te Tiriti i ēnei rā?

Kua kukune haere te mana o te Tiriti i roto i ngā tau. He maha ngā whenua o te ao e mau ana ki te tuhinga kaupapa taketake kotahi nei. Kāore a Aotearoa e pēnei ana, engari he whai kohinga ture, tikanga e tohu ana i te hanga o tō tātou kāwanatanga. Ahakoa pēhea, ko te Tiriti te whakaaetanga taketake i tatū ai te mana o Ingarangi ki tēnei whenua, i whakawhitihia ai tēnei mana ki te pāremata kaiwhakanoho tuatahi i muri mai. I ngā tekau tau tata kua mahue ake, kua whakaae ngā kāwanatanga he hanga whaitake tonu te Tiriti o Waitangi ki ngā tāngata o Aotearoa. I te tau 1994, ka puta i te Kaunihera Piriwi tana kōrero pēnei nā, ko te Tiriti o Waitangi "tētahi hanga tino whai take rawa atu i roto i te kaupapa taketake o Aotearoa". Waihoki, he pēnei anō te hā o ētahi o ngā kōrero kua puta i ngā whare whakawā o te motu mō te whai take me te hāngai o te Tiriti o Waitangi i ēnei rā.


I hea kē te Tiriti e huna ana taka mai ki nāianei?

Hei wherawhera i tēnei pātai whaitake tonu, me peka atu ki Te Rerenga o te Tiriti.



Kāore e arohia ngā tohutō i roto i ngā mahi kimi.

NGĀ HONO E HĀNGAI ANA

Tāngata Ingoa Nui

Te Puni Kokiri

Archives New Zealand