He mea waihanga i Aotearoa - Te Tiriti o Waitangi.
|

Kei tĒnei wĀhanga

Kupu Whakataki

Ngā Hainatanga

Te Rokiroki i ngā Tānga o te Tiriti

Pānuitia te Tiriti o Waitangi

Tiriti o Waitangi

English version of this page

TE RERENGA O TE TIRITI

Te Rokiroki i ngĀ TĀnga o te Tiriti

Tata tonu ka pau te Tiriti i te ahi i te paunga o ngā Tari Kāwanatanga i Tāmaki-makau-rau i te ahi i te tau 1842. Waimarie ka kapohia ake i te korokoro o te ahi e tētahi kaitiaki mauhanga ko George Elliot te ingoa. I tēnei wā e noho ana ngā tānga nei ki tētahi pouaka haumaru rino.

I muri i te ahi, ka paiherea ngā tānga kōrero katoa mō te Tiriti, ka raua atu ki tōna anō pouaka haumaru i te Tari o te Hēkeretari o te Koroni (i muri mai, ka hurihia tēnei ki te Tari Taiwhenua) i Tāmaki. I te rironga o Pōneke hei tāone matua mō Aotearoa i te tau 1864/65, ka nekehia ngā kōrero ki reira.

Mō te whā tekau tau neke atu, ka puehutia ēnei tānga taketake o te Tiriti, engari i te tau 1908, ka rokohanga atu e Tākuta Thomas Hocken i te papa whakararo o ngā Whare Kāwanatanga. Ko tāna hoki i kite ai, kua takakinohia e te wai, kua kaikainga anō hoki ngā tānga kirikoti e te kiore, i hē ai te āhua o ngā taitapa.

I te Maehe 1913, ka tīmata ngā mahi rokiroki i te Tiriti. Ka tukuna e te Tari Taiwhenua te taonga nei ki te Whare Taonga Dominion kia whakakīia haerehia ngā wāhi o ngā tānga kirikoti kua pau i ngā kiore te kai. Engari ka kitea iho he uaua rawa tēnei mahi, i te korenga o ngā rauemi i hiahiatia.

Ko ngā whakatikatika i taea, ko te whakapiri atu i ngā tānga kirikoti e rua ki te papanga kānawehi, me ngā tānga pepa e iwa ki te papanga rinena. I ngā tātaritanga o muri mai, ka kitea i whakapiria ki tētahi momo kāpia māngaro, ā, i tērā tonu ka hē kē atu te āhua o ngā tānga – ka poapoa, ka wehewehe ngā papanga, ka kōtihetihe haere anō hoki ngā tānga kirikoti. Heoi, ka whakahokia ngā tānga nei o te Tiriti i roto i tētahi pouaka i hangā ki te tini, hei pupuri mā te Tari Taiwhenua ki tōna rūma kaupare mate whawhati tata.

I muri i te rūwhenua nui o te tau 1931 i parekuratia ai Te Matau a Māui, ko te tohutohu a Tākuta G.H. Scholefield, kaiwhakataki o ngā Pūranga Kōrero i te Whare Taonga Dominion, ki te Hēkeretari o te Tari Taiwhenua, kāore e tika ana kia puritia ngā tānga kōrero whaitake tonu o te motu pērā i ngā tauira taketake o te Tiriti ki runga tonu ake i ngā ripahapa rūwhenua. Heoi, ka pīia ēnei whakatūpato a Scholefield, ā, ka noho tonu mai ngā tānga kōrero o te Tiriti ki ngā Whare Kāwanatanga.

I te tau 1940, ka tukuna te Tiriti ki Waitangi mō ngā mahi whakanui i te kotahi rau tau mai i te hainatanga. Ko te wā tuatahi tēnei i wātea ai ngā tānga nei hei tirotiro mā te iwi whānui mai i te tau 1840.

He aha rā, ka kaha ake te hiahia o te hunga tūmatanui kia mōhio ake rātou ki ngā kōrero o te Tiriti, ā, i te tau 1949, ka tono te Kaitiaki Pukapuka Matua o te Whare Pukapuka o Alexander Turnbull, a C.R.H. Taylor, kia whakaaturia ngā tānga o te Tiriti ki tana Whare Pukapuka, hei tirotiro mā te mātinitini. Heoi, kāore te Tari Taiwhenua i whakaae, kei māwhe kē atu ngā tuhituhi o runga i te ngau a Tama-nui-te-rā.

Kotahi mano, e iwa rau, e rima tekau mā ono te tau, ka whakatau iho te Tari Taiwhenua me hoatu te Tiriti o Waitangi ki te Whare Pukapuka o Alexander Turnbull hei āta tiaki māna. Ka hoahoaina he pae whakaatu motuhake mōna, engari nō te tau 1961 rawa i tū mai ai ki tōna wāhi tika, hei kai mā ngā mata o te iwi whānui.

E toro ana a Leslie Lloyd, Kairokiroki Taonga o te Whare Toi o Tāmaki-makau-rau, i Pōneke i te tau 1966, ā, ka tonoa ia kia āta tirotiro, kia tuhi pūrongo anō mō te āhua o te Tiriti. Ko tāna i tohutohu ai, “me mātua rokiroki [te Tiriti] ka tika, i te mea kua āhua pahore mai i te rinena, kua rīrapa, kua māwhe anō i te mea kua āta whitikina e te rama kōrekoreko”. Ka tahuri anō ōna tāngata ki te kimi rongoā e taea tonutia ai te Tiriti te whakaatu ki te hunga tūmatanui.

I te tau 1977 me te 1978, ka haere anō ētahi mahi rokiroki. Ka kitea ko te kaupapa o ngā tānga o te Tiriti, he pepa akuaku e piri tahi ana ki te buckram, ko te buckram, he papanga pukapuka he mea hanga ki te papahune, ki te rinena rānei, whakamahia ai hei paihere pukapuka, hei whakamārōrō kākahu.

Ka tangohia te buckram, ā, ka whakahaukūtia ngā tānga kia mākū ai te kāpia, kātahi ka āta tīhorea mai ngā pepa o muri. Ka rumakina ngā tānga pepa ki te wai hei whakangohe i te kāpia e toe tonu ana, kātahi ka tangohia tērā. Ka whakamarokehia ngā tānga, kātahi ka āta pēpēhia. I te hē o ngā mahi whakatikatika o mua, kua kōpīpī te hanga, kua kaha rongo anō i ngā pāpātanga katoa o te taiao.

E whakaaetia ana me haere tonu ngā mahi whakatikatika. I te tau 1979, nō tētahi ringa paihere pukapuka, rokiroki pukapuka ko Sydney Cockerell te ingoa te whakaaro kia tapia ngā wāhi o ngā tānga kirikoti e ngaro ana ki tētahi momo pepa ka mahia ā-ringa. Ki tāna, he pai ake tēnei i te whakamahi kirikāwhe, kirikoti hou rānei, i te mea mā te kiri hou ka kūwhewhewhewhe ngā tānga. I runga i ēnei tohutohu, ka tīmata tēnei wāhanga o ngā mahi rokiroki i te Hānuere 1980.

I te tau 1981, ka whakaaro Te Whare Tohu Tuhituhinga o Aotearoa me kaha ake ngā mahi tautiaki i te Tiriti kia kore ai te takakinohia, e tāhaetia rānei e te ringa tangata. Ka kuhuna atu ki te rūma haumaru o te Pēke Matua kia mahia rā anō he pae whakaatu haumaru ake i Te Whare Tohu Tuhituhinga o Aotearoa. I te tau 1987, ka oti i te Wāhanga Rokiroki o Te Whare Tohu Tuhituhinga tētahi pūrongo e āta whakamārama ana i te āhua o te Tiriti. Ka hurihia anō hoki te āhua o te takoto o ngā tānga kia tino iti ai te tūpono ka hē kē atu te āhua.

Ka noho, ka noho ā, ka hangaia i Te Whare Tohu Tuhituhinga i Pōneke he rūma e āta whakatakina ai ngā āhuatanga taiao. Ka kīia te rūma nei ko te Constitution Room. I tua atu i ngā pūrere hei ine i ngā āhuatanga taiao, i whakatūria anō he pūoho ka tangi ina urutomo te tangata ki roto. Nō te tau 1990 i whakatuwheratia ai, e Pirīmia Jim Bolger, hei wāhanga o ngā mahi whakanui i te 150 tau mai i te hainatanga.

Ka haere ko ētahi atu mahi whakapaipai i te whare hou o Te Whare Tohu Tuhituhinga, ā, ka whakahokia anō te Tiriti ki te Pēke Matua mō tētahi wā. Nō te marama o Noema 1991 i oti ai ngā whakapaipai nei, ā, ka whakahokia anō ki tōna pae whakaatu haumaru i te Constitution Room, ā, e noho tonu nei ki reira i tēnei wā.


Kāore e arohia ngā tohutō i roto i ngā mahi kimi.

NGĀ HONO E HĀNGAI ANA

Tāngata Ingoa Nui

Te Puni Kokiri

Archives New Zealand