He mea waihanga i Aotearoa - Te Tiriti o Waitangi.
|

KEI TĒNEI WĀHANGA

Kōrero Poto

Kupu Whakataki

A Aotearoa i ngā tau o ngā 1830

Te hanganga o ngā kaupapa-here a Ingarangi

Te Whakaputanga o te Rangatiratanga o Nu Tīreni (1835)

Ngā tau i mua tata atu i te Tiriti

Ngā kaupapa-here a Ingarangi me te Tiriti

Te Hainatanga o te Tiriti

Ngā kōrero ake o te Tiriti

Ngā rerekētanga i ngā tauira e rua o te Tiriti

Ngā take i haina ai ētahi, i kore ai ētahi e haina

Ngā mahi whakaoti

Nga Kaupapa-Here Tōmua A Te Karauna

Te Paheke atu ki te Pakanga

Te Kōti Whenua Māori

Ngā Kaupapa-Here "Whakakotahi" me ngā Urupare a te Māori

Te Wāhanga Tuatahi o te Rautau Rua Tekau

Ka Tipu Haere te aro ki te Tiriti

Te Neke ki ngā Tāone me te Tīmatanga Hou

Ngā Taukumekume mō te Tiriti

English version of this page

Ko Te HĪtori o Te Tiriti

ngĀ kaupapa here "whakakotahi" me ngĀ urupare a te MĀori

Arā ngā hua tino kino o te whakahaere a ngā kaiwhakanoho i tā rātou ake kāwanatanga. Heoi, i whakamāriritia ēnei hua kino mā te whakapau kaha tonu ki te “whakakotahitanga” o te iwi Māori i roto i te porihanga o tauiwi.  

Ko te Ture Āheinga Māori o te tau 1865 tērā, i kīia ai ngā Māori katoa he tāngata taketake ake nā te Karauna. He whakapūmau ā-ture tēnei i te kī taurangi o te Tiriti e mea ana ka ōrite ngā tikanga e whakawhiwhia ana ki a rātou ki ērā e whiwhi ana ērā atu tāngata o Ingarangi. Nā te Ture Kaiwhakawā o te tau 1867 i āhei ai ngā āpiha ā-rohe ki te whakatau take i roto i ngā hapori Māori, i raro i ngā ture Pākehā, engari me te āwhina mai a ngā āteha.

Ngā Kura Māori: 1867-1969

I te tau 1867 ka whakamanaia anō hoki e te Huinga Whānui te Ture Kura Māori. Ka whakatūria he kura he mea tautoko ā-pūtea e te Kāwanatanga, ki te tautokona anō e te Māori. I hāpaitia ēnei Kura Māori e te maha tonu o ngā hapori Māori e ngana ana kia hora tēnei ara ki ā rātou tamariki. Neke atu i te kotahi rau tau e tū ana ngā Kura Māori. Nō te tau 1969 rawa i whakakorehia ai te kaupapa nei.

Arā ētahi karu hītori e kī ana kāore kē i ea te kaupapa i whakatūria ai ngā kura nei, arā, ko te whakawhenumi i te Māori ki roto i te porihanga Pākehā. Inā rā, he tokomaha ngā kaihautū o te ao Māori i kōkiri i te oranga tonutanga o ngā tikanga Māori i kuraina i aua kura.

Te piki ake o te mautohe i runga i te whakaaro kotahi: ngā 1870 ki ngā 1890

Ka mutu ana ngā Pakanga o Aotearoa, ka mōhio haere tēnā iwi me tēnā iwi puta noa i te motu ehara ko rātou anake e haku ana i ētahi o ngā mahi a tauiwi. Ka tipu i konei te whakaaro mā te kōkiri ngātahi pea, i runga i ngā kupu o te Tiriti, e rongoāhia ai ēnei raruraru. Ka whakaritea e te Repudiation Movement o Te Matau a Māui ētahi hui i tae atu ai te tini tāngata i ngā 1870, ā, i te tau 1879 ka whakatūria e Paora Tūhaere tētahi “pāremata” ki Ōrākei. Ka āta wherawherahia ēnei take i reira. 

I te Noema 1881 ka whakaekea te kāinga o Parihaka, i Taranaki. Ka mauheretia ōna kaihautū tohe i runga i te rongomau, a Te Whiti o Rongomai rāua ko Tohu Kākahi, kāore he whakawānga. I konā ka kotahi tonu te whakaaro o te iwi Māori – me te tautoko mai a ētahi o tauiwi – ki te whakahē i tēnei tūāhua.

“ahakoa pēhea te tāpae whakaaro atu ki a koe, kāore tonu koe e aro mai, e whakautu mai”

Mai i te tau 1882 ka tīmata te haere a ōna anō māngai Māori ki Ingarangi ki te tāpae i ā rātou take ki tō rātou hoa Tiriti: katoa ēnei, i whakahokia mai ki te Kāwanatanga o Aotearoa, ā, kapea tonutia atu i reira.  I muri i tētahi o ēnei haere, ka tuhi a Kīngi Tāwhiao ki te kāwana, me te matangerengere anō, e mea ana “ahakoa pēhea te tāpae whakaaro atu ki a koe, kāore tonu koe e aro mai, e whakautu mai”. Ehara ko ia anake kei tēnei whakaaro i tēnei wā, engari ko ngā rangatira maha tonu.

I tana kōrangaranga i tēnei āhua, ka whakatū a Kīngi Tāwhiao i te Kauhanganui, me tōna anō kaupapa taketake, ōna anō tikanga whakahaere. Ka whakatūria e ngā iwi o waho o te Kīngitanga ā rātou ake hanga pēnei. Ko te Kotahitanga tonu tētahi.  I te tau 1892 ka tū tōna Pāremata Maōri tuatahi, e kīia ana ko Te Kotahitanga o Te Tiriti o Waitangi. Tekau tau te Kotahitanga e hui ana i ia tau. Katoa āna whakapaunga kaha kia whakamanaia tana tū e te Whare Pāremata whaimana o Aotearoa, ka parea ki rahaki e ngā kaitōrangapū tauiwi. He tokomaha anō rātou i puta atu i te taiwhanga taukumekume i te wā i ara ake ai te take nei, tē noho tonu ki te whiriwhiri, ki te whakarangatira i te kaupapa. 

next story.


Kāore e arohia ngā tohutō i roto i ngā mahi kimi.

Kia ngāwari, kia horo ai te pānui

Haere ki te hītori poto

 

NGĀ HONO E HĀNGAI ANA

Tāngata Ingoa Nui

Te Puni Kokiri

Archives New Zealand

Meeting of Māori and government officials at Weraroa Pa, ca 1865.
He hui o te iwi Māori me ngā āpiha o te Kāwanatanga i te Pā o Weraroa, i te takiwā o te tau 1865. 

Image: ATL
PA1-f-027-23-09
© Image copyright conditions

 

Students outside Kawhia Native School. Date and photographer unknown.
He ākonga kei waho i te Kura Māori o Kāwhia. Kāore te wā i te mōhiotia, kāore hoki te kaitango whakaahua i te mōhiotia.

Image: ATL 1/2-038443-F
© Image copyright conditions

The residence of King Tawhiao, Whatiwhatihoe, 1885.  Photograph taken by the Burton Brothers, June 1885.
Te whare o Kīngi Tāwhiao, Whatiwhatihoe, 1885.

Image: Museum of New Zealand Te Papa Tongarewa
C010282
© Image copyright conditions