He mea waihanga i Aotearoa - Te Tiriti o Waitangi.
|

KEI TĒNEI WĀHANGA

Kōrero Poto

Kupu Whakataki

A Aotearoa i ngā tau o ngā 1830

Te hanganga o ngā kaupapa-here a Ingarangi

Te Whakaputanga o te Rangatiratanga o Nu Tīreni (1835)

Ngā tau i mua tata atu i te Tiriti

Ngā kaupapa-here a Ingarangi me te Tiriti

Te Hainatanga o te Tiriti

Ngā kōrero ake o te Tiriti

Ngā rerekētanga i ngā tauira e rua o te Tiriti

Ngā take i haina ai ētahi, i kore ai ētahi e haina

Ngā mahi whakaoti

Nga Kaupapa-Here Tōmua A Te Karauna

Te Paheke atu ki te Pakanga

Te Kōti Whenua Māori

Ngā Kaupapa-Here "Whakakotahi" me ngā Urupare a te Māori

Te Wāhanga Tuatahi o te Rautau Rua Tekau

Ka Tipu Haere te aro ki te Tiriti

Te Neke ki ngā Tāone me te Tīmatanga Hou

Ngā Taukumekume mō te Tiriti

English version of this page

Ko Te HĪtori o Te Tiriti

Te hanganga o ngĀ kaupapa here a Ingarangi

I hangaia te nuinga o ngā kaupapa here a Ingarangi mō Aotearoa i ngā 1830 i Rānana. Engari me titiro anō ki te wāhi ki ngā kāwana o te koroni o New South Wales. I whakatūria a New South Wales hei koroni mō te hunga taihara i te tau 1788. Ka tae ki ngā 1830, kua tāone āhua rahi tonu a Poihākena, he rahi anō tōna hapori kaihokohoko. He whai pānga te tokomaha o ngā kaihokohoko nei ki Aotearoa me Te Moana-nui-a-Kiwa. Ahakoa kāore a Aotearoa i raro i te maru o ngā kawana o New South Wales, ka nui tā rātou aro mai ki ngā mahi a ngā tāngata o Ingarangi e noho ana i konei. Ki tā te Kāwanatanga o Ingarangi, he kāinga hauwarea noa a Aotearoa, engari i kite tonu te Kāwanatanga o New South Wales arā ētahi take i ara ake i Aotearoa kāore i taea e rātou te kore e aro atu.

Arā ētahi rōpū i Ingarangi he atawhai tāngata tā rātou kaupapa nui, he nui tonu tō rātou awe i roto i ngā mahi tārai kaupapa here a Ingarangi i ngā 1830. Ko te whakapono o ngā tāngata nei, ka ū mai ana ngā kaipōkai me ngā kaihokohoko o Ūropi ki Aotearoa, tērā tonu ka tata korehāhā te iwi Māori, pērā anō i ērā atu tāngata whenua o Āwherika me Te Moana-nui-a-Kiwa. Ahakoa he iti tō rātou mōhio ki te urutā haere o ngā mate i ērā wā, i mārama pai ngā tāngata nei me ō rātou kaitautoko i te whare pāremata nā te whakapāpātanga atu a tauiwi ki ētahi o ngā iwi ake o ngā Amerika me te tonga o Āwherika i hē katoa ai tā rātou noho, i tata korehāhā anō. Ka huri te titiro ki Ahitereiria, he pērā anō.

Arā anō ngā apārangi whaimana o Ingarangi i whakapau kaha ki te tāmi i ngā mahi whakataurekareka tāngata. I tutuki tā rātou whāinga kia turakina te kaupapa nei i te emepaea o Ingarangi i te tau 1834, heoi, ka tū tonu rātou i raro i te ingoa o te Rōpū Atawhai i ngā Tāngata Whenua, ko tāna, he whakapai ake i te noho a ngā iwi ake huri noa i te emepaea o Ingarangi. Ko Ahitereiria me Āwherika ki te Tonga ngā tino wāhi i nui te māharahara. Me kōrero te awe o te hunga atawhai i roto i te whare pāremata. Me kī nā rātou i puta ai te Pūrongo a te Komiti Whāiti o te Whare Pāremata mō ngā Tāngata Whenua (i ngā whenua kua āta nohoia e Ingarangi). He nui anō tō rātou awe i ngā kaupapa here a Ingarangi mō Aotearoa i ngā 1830.

I tautoko te Kāwanatanga o Ingarangi i ngā mahi tauhokohoko ki Aotearoa, engari kāore i whakaae kia āta whakanohonohongia.

I whakahētia e ngā kāhui atawhai te rironga o Aotearoa hei koroni, hei whenua ka āta nohoia e ngā tāngata o Ingarangi. Ko tō rātou māharahara nui, kei rite ki te koroni i te pito whaka-te-tonga o Āwherika me tō Ahitereiria. Mō ētahi tau i whaihua tā rātou aukati i ngā whakapaunga kaha a ngā kaipakihi pērā i a Edward Gibbon Wakefield kia whakaaetia e te Kāwanatanga tāna kaupapa whakanohonoho tāngata. I tautoko te Kāwanatanga o Ingarangi i ngā mahi tauhokohoko ki Aotearoa, engari kāore i whakaae kia āta whakanohonohongia. I tēnei wā, e tautoko ana ngā kaupapa here emepaea o Ingarangi i tētahi emepaea ko ngā mahi tauhokohoko here kore te tāhuhu, ehara kau ana ko te āta whakanohonoho i ana tāngata ki wīwī ki wāwā. Kei wehe motuhake te koroni (pērā i Amerika), kei pā rānei he raruraru me ngā whakapaunga moni nui (i pērā hoki te āhua i Āwherika ki te Tonga).

Kua mahi ngā āpiha o te Karauna i New South Wales ki te whakataki i ngā raruraru e hua ake ana i ngā kaihokohoko Pākehā me te Māori. I whakatūria ētahi mihingare me ētahi rangatira o Te Tai Tokerau hei Kaiwhakawā Tūmatanui, i whakawhānuitia atu te mana o ngā kōti o New South Wales ki te whakawā i ētahi raruraru i ara ake i Aotearoa, i āta tautokona anō hoki ngā mahi a ngā whakahaere mihingare o Ingarangi i Aotearoa (ko te CMS o te hāhi Mihingare te whakahaere mātāmua).

Engari kāore i pērā rawa te roa o te ringa toro o te ture, arā mai i ngā kōti o New South Wales ki ngā tāngata hara o konei. I kitea tēnei i te urunga atu o ētahi tāngata o Ingarangi ki ngā riri a te iwi Māori, engari i māmā noa tā rātou karo i te ngau a te ture i Poihākena. Ko Kāpene Stewart pea, o te Elizabeth, te tino tauira o tēnei. Nāna i āwhina a Te Rauparaha me tōna apataki i tā rātou whakaekenga i a Ngāi Tahu, i parekuratia ai a Ngāi Tahu. I tēnei āhua, ka whakaae te Kāwanatanga o New South Wales me pakari ake te kitea o ngā kātipa i Aotearoa. Ka whakaae te Kāwanatanga o Ingarangi, ā, whakaritea ana ko James Busby (Te Pūhipi) hei Rēreneti o Ingarangi (he momo kātipa tēnei hei tiaki i ā Ingarangi ake).

Heoi anō tāna, he tiaki kau i te haki o Ingarangi.

Ko te mahi i tohua mā Te Pūhipi, māna e mauhere ngā taihara i Aotearoa e karo ana i te ngau a te ture me ērā atu tāngata mahi kino, ka tuku atu ai ki New South Wales. Engari kāore i whakaritea he pirihimana, he aha atu hei tautoko i a ia. Heoi anō tāna, he tiaki kau i te haki o Ingarangi. Ka puta ana ia ki waho o Pēwhairangi, me uaua ka haere tawhiti, waihoki, kāore te Kāwana o New South Wales, a Kāwana Bourke, me ētahi o ngā mihingare, i tino rata ki a ia. E rika ana a James Stephen, o te Tari o ngā Koroni, ki te whakarite i tētahi tangata pai ake hei piki tūranga mōna.

I te iwi Māori anō āna ake pūnaha mō te wāhi ki te ture, te mana, me ngā mahi paihere i te tangata. Engari ka taka mā Te Pūhipi e whakariterite ngā rangatira Māori kia whakaae rawa mai ngā mana o Ingarangi āe, kua tū he kāwanatanga āhua pakari nei ki Aotearoa. He mea akiaki nāna ngā rangatira nei kia whakatakoto ture e āhua rite ana ki ā te Pākehā, mā rātou anō e whakataki ngā ture nei, me te āwhina mai a tētahi manuao o te Roera Nawi o Poihākena i ōna wā anō. Engari he niho kore a Te Pūhipi. I ētahi wā, ka mahi te Kāwanatanga o New South Wales i ētahi mahi i Aotearoa me te kore tonu e whakamōhio i a ia. Ko te kupu whakarite a tētahi tangata mō Te Pūhipi i ērā wā, he “manuao kore pū”. Heoi anō, ko ia pea te whakatinanatanga o te whakataukī ‘ka whati te tai, ka pao te tōrea’. Arā te tino tauira, ko tana tārai i te Whakaputanga o te Rangatiratanga o Nu Tīreni i te tau 1835. Ki tā ētahi karu hītori, he whakapuakitanga tēnei o te kotahitanga o te iwi Māori.

next story.

Up.


Kāore e arohia ngā tohutō i roto i ngā mahi kimi.

Kia ngāwari, kia horo ai te pānui

Haere ki te hītori poto

 

NGĀ HONO E HĀNGAI ANA

Tāngata Ingoa Nui

Te Puni Kokiri

Archives New Zealand

Artist unknown: [Album of an officer]. From verandah, Sydney Barracks. Jan. 7 1857.
Ngā Whare Hōia i Poihākena, 7 Hānuere 1857.

Image: ATL A-277-036
© Image copyright conditions

Angas, George French  1822-1886: E Wai, his wife.  Na Horua or Tom Street, (elder brother of Rauparaha).  Tuarau or Kopai (his son), at Kahotea near Porirua. /  George French Angas [delt]; W. Hawkins [lith].  Plate 19, 1847.
Te Wainokenoke (e noho ana), i te taha mauī o Nohorua (kua mokoia te kanohi, he whai pāhau hina). Kei muri i a rāua e tū ana ko te tama a Nohorua, a Tuarau, he paraikete e kōpaki ana i a ia, ca 1844.

Image: ATL PUBL-0014-19
© Image copyright conditions

Earle, Augustus, 1793-1838: Natives of N[ew] S[outh] Wales as seen in the streets of Sydney / A Earle. Printed by C Hullmandel. [1830].
"Te tangata whenua o N[ew] S[outh] Wales, i ngā tiriti o Poihākena.” 1830.

Image: ATL PUBL-0053-04
© Image copyright conditions

Wivell, Abraham  1786-1849: Edward Gibbon Wakefield, Esq.  Engraved by B Holl from a drawing by A Wivell, 1823.  London, 1826.
Edward Gibbon Wakefield.

Image: ATL A-042-023
© Image copyright conditions