He mea waihanga i Aotearoa - Te Tiriti o Waitangi.
|

KEI TĒNEI WĀHANGA

Kōrero Poto

Kupu Whakataki

A Aotearoa i ngā tau o ngā 1830

Te hanganga o ngā kaupapa-here a Ingarangi

Te Whakaputanga o te Rangatiratanga o Nu Tīreni (1835)

Ngā tau i mua tata atu i te Tiriti

Ngā kaupapa-here a Ingarangi me te Tiriti

Te Hainatanga o te Tiriti

Ngā kōrero ake o te Tiriti

Ngā rerekētanga i ngā tauira e rua o te Tiriti

Ngā take i haina ai ētahi, i kore ai ētahi e haina

Ngā mahi whakaoti

Nga Kaupapa-Here Tōmua A Te Karauna

Te Paheke atu ki te Pakanga

Te Kōti Whenua Māori

Ngā Kaupapa-Here "Whakakotahi" me ngā Urupare a te Māori

Te Wāhanga Tuatahi o te Rautau Rua Tekau

Ka Tipu Haere te aro ki te Tiriti

Te Neke ki ngā Tāone me te Tīmatanga Hou

Ngā Taukumekume mō te Tiriti

English version of this page

Ko Te HĪtori o Te Tiriti

NgĀ take i haina ai Ētahi, i kore ai Ētahi e haina

Kia tino mārama ai te tangata ki te Tiriti o Waitangi, me titiro anō ki ngā wawata o te iwi Māori, kaua ō te Kāwanatanga o Ingarangi me ngā āpiha Karauna anake. He aha ngā tūmanako o ngā rangatira āhua 500 nei nāna i haina te Tiriti puta noa i te motu? He aha anō ngā take i kore ai ētahi e haina?

Ko te whakaae, ko te kore whakaae rānei ki te haina, kei te āhua tonu o ngā kōrero mō te Tiriti i hora ki ō rātou aroaro, ki ngā kupu ake o te tauira Māori, ki ngā whakamārama a ngā āpiha Karauna me ērā atu kaitohutohu, tae atu ki ō rātou ake whakaaro ki ngā painga ka puta ina hainatia. Ko te tuatoru me te tuawhā o ēnei, i rerekē i tēnā wāhi, i tēnā wāhi. Nō reira he rerekē anō ngā take i haina ai tēnā me tēnā. Arā anō ētahi i haina me te anipā anō, te ngākaurua rānei ki ngā hua tērā e puta.

Ko tētahi take i tino poraru ai te Māori, ko te hokonga whenua, arā, ko te whakaae ki te hoko i ngā whenua ki te Karauna anake. Te āhua nei kotahi anake te wā, i te kawenga atu o te Tiriti ki Tauranga e Kāpene Bunbury, i āta kōrerorerotia ai tēnei āhua. Tērā tonu pea ko ngā kaiwhakamārama tonu kāore i tino mārama ki te tikanga o te kupu Pākehā nei, o te ‘pre-emption’. Ko te whakapono o ngā Māori i ētahi rohe, me mātua hora ki te Karauna i te tuatahi, engari ki te kore te Karauna e hiahia ki te whenua, ki te kore rānei e whakaaetia ngātahitia te utu, kua wātea rātou ki te hoko ki tā rātou i pīrangi ai. Engari i raro i te ture, ko te tikanga o te pre-emption, me mātua hoko ki te Karauna, kāore i kō atu, i kō mai i tērā.

He iti ngā kōrero mō te rironga o te mana whenua i a Ingarangi, me te pānga o tēnei ki te iwi Māori.

Ko tētahi painga i kōrero nuitia e te hunga e whakamārama ana i te Tiriti ki te Māori, ko te taka o ngā Pākehā e noho ana ki Aotearoa ki raro i te mana o te Karauna. Mai i te tau 1831, kua tono ngā rangatira kia pērāhia rātou. Waihoki, he iti ngā kōrero mō te rironga o te mana whenua i a Ingarangi, me te pānga o tēnei ki te iwi Māori, ā, ahakoa pēhea, ki tā te Māori ko te upoko tuarua e kī ana ka whakapūmautia, ka tiakina e te Kāwanatanga o Ingarangi te tūranga me te mana o ngā rangatira. He wāhi nui anō kei ngā kī taurangi a ngā mihingare e mea ana ākuni te puta ai he painga ki te iwi Māori, i te Tiriti. Nā konā i mauru ai ngā āwangawanga o ngā rangatira tokomaha. Ki ētahi, tae atu ki ngā rangatira tokomaha o Te Tai Tokerau, he kawenata tapu te Tiriti i waenga i a rātou me Kuini Wikitoria. He Karaitiana hoki ētahi, ā, kāore i wehea e rātou te Karauna me ngā akoranga Karaitiana.

He tūmanako tonu ō ngā rangatira Māori i haina i te Tiriti mō ngā hua ka puta i tēnei kawenata hou ki te Karauna. Ka mahi ngātahi ngā mana e rua ki te whakahaere i te whenua, engari i te mutunga iho, ka whakakaha ake tēnei i te mana o ngā rangatira. Ka āraia atu ērā atu rāwaho tērā ka whakaaro ki te tango i Aotearoa mō rātou ake. Ka noho mai he kāwana pērā i tō New South Wales, hei whakahaere i a tauiwi, tae atu ki ngā kaihoko whenua Pākehā kua hua ake he raruraru i ētahi o ā rātou hokohoko. Mā te kāwana anō e hoko ētahi whenua i te Māori hei hoko ki a tauiwi. I hiahia tonu ētahi Māori kia hokona, kia nohoia ētahi o ō rātou whenua e tauiwi. E tino hāngai ana tēnei kōrero ki ngā wāhi e tautohea ana nō wai ake aua whenua. Ki tā ngā rangatira anō, mā te Tiriti, ka taetae tonu mai a tauiwi ki Aotearoa noho ai, ka nui ake te hunga hei hoko i ā rātou kai me ērā atu rawa, ka nui ake anō ngā mea hei hoko mai mā rātou. Ka nui ake anō te hiahia kia whakatūria he wharau, kia parahia ngā ara hīkoi me ērā atu ratonga ka taea noatia e te Māori. Kāore hoki ngā rangatira i kāpō ki ngā rerekētanga kua pā ki te noho a te Māori mai i te taenga tuatahitanga a te Pākehā i te tau 1769, e pāpā tonu nei ki a rātou i te tau 1840, ā, ka mau tonu i ngā rā kei te heke iho.

next story.


Kāore e arohia ngā tohutō i roto i ngā mahi kimi.

Kia ngāwari, kia horo ai te pānui

Haere ki te hītori poto

 

NGĀ HONO E HĀNGAI ANA

Tāngata Ingoa Nui

Te Puni Kokiri

Archives New Zealand

Photographer unknown: Portrait of Taraia Ngakuti te Tumuhia  1790?-1872. Taraia did not sign the treaty.
Taraia Ngakuti te Tumuhia. Kāore a Taraia i haina i te Tiriti.

Image: ATL PA2-2820
© Image copyright conditions

Thomas Bunbury, around 1861.
Thomas Bunbury, ca 1861.

Image: ATL PAColl-6075-15
© Image copyright conditions

Angas, George French  1822-1886: Te Moanaroa (Stephen). Te Awaitaia (William Naylor), Waingaroa.  George French Angas [delt]; W. Hawkins [lith].  Plate 5, 1847. Both men were converts to Christianity.
Te Moanaroa (ko Te Amoahanga, ko Amoanaroa pea ētahi atu ingoa ōna) o Whāingaroa (i te taha mauī), me Te Awaitaia (William Naylor). E kīia ana ko te tokorua nei he rangatira nō Waikato 1844.

ATL: PUBL-0014-05
© Image copyright conditions